Kamis, 28 April 2011

XANANA “SAUDADES” HO DOUTRINA LOBATO


.

JOSEFA PARADA – SUARA TIMOR LOROSAE – 16 fevereiru 2011

DILI – Iha tempu rezistensia, Eis Presidente da Republika, Saudozu Nicolau Lobato hanorin joven no politiku sira atu pratika politika respeita malu. Infelizmente, oras ne’e politiku barak mak haluha ona dutrina ida ne’e, hodi pratika fali politika insulta malu.
Realidade ne’e sai preokupasaun boot ba Primeiru Ministru Kay Rala Xanana Gusmão, hodi responde politiku barak ne’ebe seidauk komprende diak pozisaun Estadu Timor-Leste hakotu misaun UNMIT iha tinan 2012.

Xanana relembra, uluk Nicolau Lobato gosta liu hanorin joven no politikus barak atu aprende koalia politika iha ambiente demokrasia ho diak. Lobato bandu atu labele koalia politika insulta ema seluk.

“Ita iha demokrasia ema koalia oi–oin, maibe ita nia demokrasia ne’e tenki koalia tuir Prezidente Nicolau Lobato hanorin ita katak, politiku diak ida laos politiku nebe koalia arbiru deit lor-loron,” Xanana hateten nune’e, hafoin inkontru ho Prezidente da Republika, Jose Ramos Horta, foin lalais ne’e.

Bazeia ba preokupasaun ne’e, Xefe Governu ne’e husu ba lider politikus tomak atu koalia politika ho kuidadu no labele koalia politika atu kritika no insulta fali ema seluk. “Koalia politika respeita malu, ida ne’e maka politika,” nia fo hanoin.

Atual Prezidente CNRT ne’e mos ejije ba nia kuadrus politikus CNRT tomak tenki koalia politika tuir izemplu edukasaun politika nebe hanorin ona husi Prezidente Nicolau Lobato.

“Iha hau nia partidu rasik mos hau ejije, ita tenki halo tuir Prezidente Nicolau. Entaun ita tenki kaer nia hanorin, tanba se ita koalia arbiru deit nia la gosta, maibe se ita halo tuir nia dutrina, ita sei koalia diak sai politika diak,” Xanana dehan.

Iha fatin hanesan, PR Horta hatete, lider sira tenki sukat kuandu koalia politika, atu nune’e povu labele sai vitima husi lider sira nia linguazen politika nebe la edukativu.

Horta mos husu atu ema tomak uza demokrasia tenki sukat, no labele uza demokrasia atu insulta ema seluk nia privasidade. Entretantu Deputadu Natalino dos Santos husi Bankada CNRT haktuir, dalabarak sira kritika lider balun, tanba lider balun mos sempre insulta sira. Hanesan nasaun demokratika, Timor-Leste presiza aprende buat barak atu koalia iha palku politika ne’ebe edukativu hodi nune’e la fo impaktu ba ema ou grupu seluk.

Iha parte seluk, Deputadu Mateus de Jesus konsidera preokupasaun PM Xanana nian, hanesan lisaun ba lider politikus foun no tuan atu respeita malu wainhira halo debate ruma. Ne’e signifika katak, wainhira lider politiku ida halo kritika ba servisu governu ho grupu ruma, presiza bazeia ba faktus ou evidensia ruma, atu nune’e povu tomak labele sai vitima.ego
.

Tidak ada komentar: